இந்தியன் ஸ்டைல் சில்லி சிக்கன்

நேயர்களே நாளை விடுமறை என்பதால் நம்மில் அநேகருக்கு ஒரே குழப்பமாக இருக்கும். வீட்டில் இருப்பவர்களுக்கு என்ன மாதிரி உணவு செய்வது, புதிதாக எதாவது செய்து அசத்தலாமா என்று எண்ணிக்கொண்டிருப்பீர்கள். உங்களுக்காகவே பிரத்தியேகமாக இதோ சில ரெசிப்பிகளை தருவதற்கு தயாராகி வந்துவிட்டோம். பொதுவாக சிக்கன் என்றால் குழந்தைகள் முதல் பெரியவர்கள் வரை அனைவரும் விரும்பி உண்ணப்படும் உணவாக உள்ளது. அதில் கொஞ்சம் வித்தியாசமாக எப்போதும் செய்யும் கிரேவிகளை ஒதுக்கிவிட்டு இங்கே நாங்கள் கொடுக்கும் இந்தியன் ஸ்டைல் சி்ல்லி சிக்கனை ட்ரெய் பண்ணி பாருங்கள். பிறகென்ன உங்கள் சமையல் தான் அன்றைய நாள் முழுவதும் உங்கள் வீட்டில் ராஜாவாக வலம் வந்து கொண்டிருக்கும். தேவையான பொருட்கள்: எலும்பில்லாத சிக்கன் - 500 கிராம் இஞ்சி பூண்டு பேஸ்ட் - 2 டீஸ்பூன் எலுமிச்சை - 2 (சாறு எடுத்துக் கொள்ளவும்) முட்டை - 1 சிக்கன் ஸ்டாக் - 1 கப் தக்காளி கெட்ச்சப் - 2 டேபிள் ஸ்பூன் சில்லி சாஸ் - 1 டேபிள் ஸ்பூன் சோயா சாஸ் - 2 டேபிள் ஸ்பூன் இஞ்சி - 1 இன்ச் (நறுக்கியது) பச்சை மிளகாய் - 1 (நறுக்கியது) பூண்டு - 5-6 பற்கள் (நறுக்கியது) வெங்காயத் தாள் - 1 கப் (நறுக்கியது) சோள மாவு - 1 கப் மைதா - 1/2 கப் வினிகர் - 2 டீஸ்பூன் உப்பு - தேவையான அளவு எண்ணெய் - 3 டேபிள் ஸ்பூன் செய்முறை: முதலில் சிக்கனை நன்கு சுத்தமாக கழுவி ஒரு பௌலில் போட்டு, அத்துடன் எலுமிச்சை சாறு, இஞ்சி பூண்டு பேஸ்ட், உப்பு சேர்த்து நன்கு பிரட்டி, 15 நிமிடம் ஊற வைத்துக் கொள்ள வேண்டும். பின்னர் அதில் முட்டையை உடைத்து ஊற்றி, நன்கு பிரட்டி, 15 நிமிடம் ஊற வைத்துக் கொள்ள வேண்டும். பின்பு ஒரு பௌலில் சோள மாவு, மைதா மற்றும் உப்பு சேர்த்து கலந்து கொள்ள வேண்டும். பிறகு ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி காய்ந்ததும், பிரட்டி வைத்துள்ள சிக்கன் துண்டுகளை மைதா கலவையில் பிரட்டி, எண்ணெயில் போட்டு 7-8 நிமிடம் வேக வைத்து, ஒரு தட்டில் தனியாக வைத்துக் கொள்ள வேண்டும். அடுத்து மற்றொரு அகன்ற வாணலியை அடுப்பில் வைத்து, அதில் 1 டேபிள் ஸ்பூன் நந்லெண்ணெய் ஊற்றி காய்ந்ததும், நறுக்கி வைத்துள்ள பூண்டு, இஞ்சி, பச்சை மிளகாய் மற்றும் வெங்காயத் தாள் சேர்த்து 2-3 நிமிடம் வதக்கிக் கொள்ள வேண்டும். பின் அதில் சோயா சாஸ், வினிகர், சில்லி சாஸ் மற்றும் தக்காளி கெட்ச்சப் சேர்த்து நன்கு கிளறி, 1 நிமிடம் வேக வைத்து, அடுத்து அதில் சிக்கன் ஸ்டாக் ஊற்றி கொதிக்க விட வேண்டும். கலவையானது ஓரளவு கெட்டியான பதத்திற்கு வரும் போது, அதில் சிக்கன் துண்டுகளைப் போட்டு, கிளறி விட வேண்டும். ஒருவேளை அதிக அளவில் தண்ணீர் இருப்பது போன்று இருந்தால், அத்துடன் 1 டீஸ்பூன் சோள மாவு சேர்த்து கிளறினால், அதில் உள்ள அதிகப்படியான நீரானது குறைந்துவிடும். பின் அதில் வெங்காயத் தாள் தூவி கிளறி இறக்கினால், இந்தியன் ஸ்டைல் சில்லி சிக்கன் ரெடி!!! குறிப்பு: இதில் அதிக அளவில் உப்பு சேர்க்க வேண்டாம். ஏனெனில் சோயா சாஸில் ஏற்கனவே உப்பு இருப்பதால், இறுதியில் உப்பு சேர்க்காமல் இருப்பதே நல்லது.